Ҳар бир ўзбек оиласида қиз бола улғаяр экан, унинг эшигидан эниб келган совчилар — элчиларнинг қадами қутлуғ, деб қарашади. Бу, аввало, қиз ўсаётган хонадон ҳурмати, йигит томоннинг қадр-қимматидир. Бу шундай нозик риштаки, унда жами удумларимизнинг, қадриятларимизнинг энг ардоқли нуқталари, беқиёс комиллиги, ҳаё ва иффатнинг айтилмаса ҳам илғаб олинадиган энг эзгу тилакларининг эшиги очиладиган муқаддасликни ўзида намоён қила олади. Халқда “Кимки, етти марта совчиликни адо этса, унинг у дунёси билан бу дунёси обод, чунки у икки дунёнинг ҳам савобни олган” дейишади.
Совчилик — элчилик. Уларнинг қадамларида энг улуғ мақсад парвоз қилади — янги оиланинг дунёга келишига сабабчи бўлиш. Шунинг учун ҳам уларнинг қадами қушдан енгил, сўзлари асалдан ширин, нигоҳлари меҳрга тўла, чеҳрасидан нур ёғилиб туради.
Раҳматли энам мен келин бўлиб тушгандан кейин менга кимни совчи қилиб юборганликларини айтиб, у кишининг кимлигини мен албатта билишим шартлигини таъкидлаган эдилар. Совчи — икки томонга ҳам холис, икки томоннинг барча жиҳатларини мукаммал биладиган инсон бўлиши керак. Менга совчи бўлган киши — ён қўшнимиз, Болибек бобо дегич эди. У киши бизнинг уйга тез-тез келиб турар, энамнинг энг яхши суҳбатдошларидан бир эди. Жойлари жаннатда бўлсин бобонинг! У кишининг қулоғимга чалиниб қолган сўзларини ажиб ҳайрат билан эслайман: “Кимга совчи бўлган бўлсам, минг шукурким, ўзидан тинчиб кетишди. Кечаю-кундуз ўз болаларимни қандай дуо қилсам, уларнинг ҳам номларини айтиб, дуо қиламан, нега деганда, улар ҳам ўғил-қизларим-да! Ўзидан ўзи кўпайиб юрсин дейман-да…”